Анчид сүүлчийн цохилт өгөхөд бэлэн болоод байлаа.
Мянган жилийн тэртээ эртний Ромд Нероны цирк хэмээх дугуй хүрээлэн буюу Коллизейд элсээр хучсан тайзан дээр, ялд унасан хүний өөдөөс өлөн арслан тавьж олныг цэнгүүлдэг байжээ. Одоо бол соён гэгээрсэн хорьдугаар зуун. Циркийн үзвэрийг Манхэттений үйлдвэр худалдааныхны хэсгийн эрүүгийн шүүхийн байшингийн 16 дугаар танхимд зохиож байлаа.
Танхимд энэ үйл явдлыг хойч үеийнхэнд зориулан тэмдэглэж авах хурдан бичээч хүүхэн, хэвлэл мэдээллийн хэдэн арван төлөөлөгч, хүн амины хэрэг үйлдсэн этгээдийн хэргийг таслах шүүхийн хурал болно гэсэн сонины зарлалд татагдан ирсэн үзэгчид цуглажээ.
Яллагдагч Майкл Моретти хэмээх гуч гаруй насны цэвэрхэн сайхан царайтай, дүнсгэр эр өмгөөлөгчийн ширээний хажууд сууж байв. Мореттигийн нүүр царайг хэсэг хэсэг хавтгай мод зүйгээд хийчихсэн юм шиг ширүүн дориун харагдана. Хар үсээ ганган маягаар засуулсан байх агаад эрүүн дээрээ гайхмаар жижигхэн хомхорхойтой, хөнхөр нүд нь шар ногоон өнгөтэй аж Тэр гол шиг эр дээд зэргийн уран хүнээр хийлгэсэн костюм, цэнхэр цамц өмсөж, хөх зангиа зүүж, шаахайгаа гялалзтал зүлгэжээ.
